Аймақтарда алдағы жылу маусымына дайындық басталды. Өңір жаңалықтары

Риддер қаласындағы жылу қазандығын жөндеу жұмыстары қайта жанданды.

Орталық турбиналармен қатар жылу жүйесінің 55 учаскесін жаңарту қолға алынған. Шамамен 20 шақырым құбыр ауыстырылады. Бұл мақсатқа өңірлік бюджеттен 8 млрд теңге бөлінді. Жылыту қазандығы жарты ғасырға жуық күрделі жөндеу көрмеген. Соңғы 3 жылда станция, 80 мәрте істен шыққан. 

Шымкенттің Еңбекші ауданындағы мектептің шатыры өртенді.

Оқушылар мен мұғалімдер дін аман. Олар дер кезінде сыртқа шығып үлгерген. Өртті сөндіруге 52 маман мен 8 бірлік техника жұмылдырылды. Алдын ала болжам бойынша тілсіз жаудың тұтануына электр сымдарының тұйықталуы себеп болған. 

Солтүстік Қазақстан облысында пара алды деген күдікпен аудан әкімінің орынбасары мен бөлім басшысы ұсталды.

Бұл туралы Сыбайлас жемқорлыққа қарсы қызмет өкілдері хабарлады. Тергеу мәліметтеріне қарағанда, лауазымды тұлғалар аудандық маңызы бар жолдарды жөндеумен айналысқан кәсіпкерден 10 млн теңге алған. Қазір осыған байланысты сотқа дейінгі тергеу амалдары басталды.