«Таза Қазақстан» акциясы аясында одан әрі ауқымды жұмыстар атқарылмақ
«Таза Қазақстан» республикалық экологиялық акциясы аясында одан әрі ауқымды жұмыстар атқарылмақ. Енді ересектерден бөлек, «Жасыл балабақша» бағытында 622 мектепке дейінгі ұйым мен оқушылар арасында экологиялық жарыстар ұйымдастырылады. Бүгін Экология және табиғи ресурстар вице-министрі алдағы 5 жылдық жоспармен бөлісті. Айтуынша, қалалар мен ірі елді мекендерде су үнемдеу технологиялары енгізіледі. Жасыл желектерді отырғызу көлемі ұлғайтылмақ. Одан бөлек, ормандардың жай-күйін бақылау үшін бірыңғай ақпараттық жүйені әзірлеуде.
Жомарт Әлиев, ҚР Экология және табиғи ресурстар вице-министрі:
-Мемлекет басшысы белгіленген тәртіппен «Таза Қазақстан» экологиялық мәдениетін дамытудың 2024-2029 жылдарға арналған тұжырымдамасын әзірлеп, бекітуді тапсырды. Басты мақсат – барлық жастағы азаматтарда экологиялық мәдениетті қалыптастыру. Осы бағытта біз мардымды жұмыстар атқаратын боламыз.