Президенттің баспасөз қызметі мен KYRAN FILMS байқау жариялады

Дүниежүзілік көшпенділер ойындары туралы үздік ролик түсіріп, Қасым-Жомарт Тоқаевтың жеке мобилографы болыңыз. Президенттің баспасөз қызметі және KYRAN FILMS компаниясы республикалық байқау жариялады. Жеңімпазды Мемлекет басшысымен бірге жұмыс істеу мүмкіндігінен бөлек, ақшалай, заттай сыйлықтар да күтіп тұр. Жалпы 150 орынға дейін қатысушылар сыйлықсыз қалмайды.

Иә, Президенттің жеке мобилографы. Бұл мүмкіндікке әркімнің таласы бар. Ол үшін KYRAN FILMS компаниясы мен Президенттің баспасөз қызметі ұйымдастырып жатқан үздік ролик бәйгесінде жүзден жүйрік шығу шарт. Байқау V Дүниежүзілік көшпенділер ойындарына орайластырылып отыр.

Берік Уәли, ҚР Президентінің кеңесшісі - Президенттің баспасөз хатшысы:
- Әлемнің 90-ға жуық мемлекетінен 2 мыңнан астам спортшы қатысады. Сондықтан бұл бәсекенің бәсі биік.

Үздік ролик байқауының бәсі жоғары. Оны мобилографтар бәйгесінің жүлде қоры аңғартып тұр. Гран-при иегеріне 1 млн теңге ақшалай сыйлық пен Президенттің жеке қолтаңбасы және ең соңғы үлгідегі Iphone. Екінші орынға 1 млн теңге, 3-орынға Iphone соңғы үлгісі. 4-орын да жүлдесіз қалмайды, 500 мың теңге бұйырады. 5-15-орын аралығындағылар мобилографқа қажет жарық, дыбыс құралдарын сыйға алады. Ал 16-20-шы орынға дейін иеленгендерді тегін мобилография курсы күтіп тұр. 21-ден 100-орынға дейінгілерге жеке мадақтамалар, 101-150 орынға дейінгілерге арнайы сертификаттар беріледі. Сондай-ақ бөлек 50 орын қарастырылады. Әлеуметтік желіде 100 мың қаралым жинағандарға 50 мың теңгеден ақшалай сыйлық беріледі. Мобилографтар жырғап қалайын деп тұр, тек тамаша мүмкіндікті жібермеулері керек. Ал байқаудың мақсатына келсек:

Берік Уәли, ҚР Президентінің кеңесшісі - Президенттің баспасөз хатшысы:
- Бабадан қалған мол мұраны, бүгінге жеткен асыл қазынаны көзіміздің қарашығындай сақтап, болашаққа мирас ету - бүгінгі ұрпақтың борышы.  Тамыры тереңнен тартатын спорттық ойындарды халық арасында кеңінен насихаттау, көшпенділер ойындарының мәні мен маңызын арттыру, дүбірлі доданы жоғары деңгейде өткізу.

Ол үшін үміткерлерге креативті бейнеролик түсіріп, #nomadgamesfest хэштегімен әлеуметтік желідегі парақшасына жүктесе жетіп жатыр. Байқауға өтінімдер 1 қыркүйекке дейін қабылданады, ал жеңімпаз 9 қыркүйекте анықталады.

Авторы: Берік Дүйсенбай