«Семей» футзалдан тұңғыш рет Қазақстан чемпионы атанды

«Семей» футзалдан тұңғыш рет ел чемпионы атанды. Құрылғанына небәрі бір жыл болған команда финалда «Қайраттан» басым түсті. Алматы ұжымы кейінгі 20 жылдан бері бас жүлдені ешкімге ұстатпай келген еді. Финалдық серияның төртінші ойыны Семей қаласында өтті. Тартысқа толы болған матчта алаң иелерінің мерейі үстем болды. Негізгі уақытта қарсыластар нәтижелі шабуыл ұйымдастырып, 3:3 есебімен тарқасты. Қосымша уақытта да матч тең аяқталды. Кайо Торрестің голына «Қайрат» сапынан Алиссон қарымта қайтарды. Пенальти тебуде «Семей» жігіттері мергендік танытты. Қорытынды есеп:4:3. «Семейдің» пайдасында. Абай облысының ұжымы финалдық сериядағы төрт ойынның үшеуінде жеңіске жетті.