Жастар чемпионаты: Қазақстан Украинадан басым түсті. Спорт жаңалықтары

19 жасқа дейінгі футболшылар 2025-ші жылғы Еуропа чемпионатына іріктеу турнирін сәтті бастады. Біздің жігіттер кездесу тағдырын бірінші таймда шешіп тастады. 9-шы және 35-ші минутта Темірлан Агиманов екі мәрте мергендік танытты.

Украин ойыншылары жалғыз доппен жауап қатты. Қорытынды есеп:2:1. Қазақстан келесі ойынын 16-шы қарашада Нидерланд құрамасымен өткізеді. Сосын Словениямен алаңға шығады. Еуропа чемпионатына іріктеу турнирі Нидерландтың Ассен қаласында өтіп жатыр.

Таразда күрес түрлерінен ел кубогы басталды. 400-ден аса балуанның басын қосқан боз кілем бәсекесінде классиктер белдесуі аяқталды. Грек-рим күресінен 10 салмақта кубок иегері анықталды. 55 келіде Ербол Камалиев топ жарды. 60 келі салмақта Бақытжан Қабдыл, ал 63 келіде Мейрамбек Айнағұлов жеңіске жетті. 67 келінің мықтысы Мейіржан Шермағанбет қарсыластарын түгел жығып, Қазақстан кубогының жеңімпазы атанды. Әділхан Сатаев 72 келіде алдына жан салмады. 77 келі салмақта Ибрагим Магомадов кубоққа қол созды. Ауыр салмақтарда Омар Сатаев, Шәміл Ожаев және Ілияс Гучугов жеңіске жетті. 130 келіде Әлімхан Сыздықов қарсылас шыдатпады.