«Хабар» арнасының тапсырысымен «Несібелі несие» сериалының түсірілімі басталды

Онда мінездері мен тағдырлары екі бөлек егіздердің өмірі көрсетіледі. Бірі қарызға белшесінен батып, екіншісі із-түзсіз жоғалып кетеді.

Оқиға желісі бойынша бас кейіпкер Ербол - ес білгелі Америкада өскен. 33 жастағы жігіттің қаржылық жағдайы мүшкіл. Себебі банкроттыққа жақындаған ол криминалды топтарға қомақты сома қарыз. Берешегінен құтылар жалғыз жол – өгей ата-анасынан қалған мұраны алу. Бірақ мұнда да белгілі бір қиындықтар бар.

Атамұра Мұсаханов, актёр:

- Менің көбінесе ойнайтын кейіпкерім - Ербол. Ол Америка Құрама Штаттарынан келген жақында. Келу себебі – Дарханды екінші егізін іздеу. Оны да іздеуінің бір себебі бар. Ол америкалық ата-анасының қалдырған  ақшасын сол Дарханның қолы арқылы ғана ала алады. 30 жылдан кейін соны іздеп келген.

Ал Дархан бауыры Астанаға келмес бұрын жоғалып кеткен. Қарыздың қысымынан қашқан егізін табу үшін Ербол барын салады. Тіпті оны үйде де, жұмыста да алмастырады.

Айта кеткен жөн, Атамұра Мұсаханов бұл жобада егіздердің рөлін бір өзі сомдайды.

Актердің бас кейіпкермен ұқсастықтары да жоқ емес. Жақында ғана ол Америка Құрама Штаттарынан келген. Оған қоса, сериалда Макс есімді шетелдік кейіпкер де бар. Ол бұзақының рөлін сомдайды.

Миракл Фрэнсис, актёр:

- Менің атым – Миракл. Бұл менің Қазақстандағы алғашқы рөлім. Мен сомдайтын Макс бастапқыда бастығының қарызын Ерболдан игеріп алу үшін барын салса, бірте-бірте өзгере бастайды. Ербол екеуінің арасында шынайы достық пайда болады.

Жоба режиссері: «Басты мақсат – жоғалған ағайындылардың қауышуы мен әзіл-қалжыңға толы сәттерді ғана көрсету емес, көрерменді қаржылық сауаттылыққа жетелеу»,- дейді.

Еламан Шаубанов, режиссёр:

- Бұл коллекторлық кеңсе. Басты кейіпкеріміз коллектор болады. Әртүрлі адамдармен кездеседі, қаржылық бір шұңқырларға түскен адамдармен кездеседі. Кредитті той үшін алып, тойды жарқыратып өткізеді де, бірақ ақыры 10-15 жыл бойы соны төлеп жатқан.

Осылайша, егіздердің оқиғасы арқылы көпті алаңдатқан түйткілді мәселе қозғалмақ. Бауырлардың қызығы мен шыжығы мол оқиғаларына толы сериал арнамыздан көрсетіледі.

Дана Әлиева, Азамат Саметов