«Алматы-Өскемен» автожолында 18 көлік соқтығысты

Жетісу өңірінде бірнеше оқыс оқиға болды.

Таңғы 7:30 шамасында «Алматы-Өскемен» автожолының 28 шақырымында Алматы-Қонаев бағытында 18 көлік соқтығысты. Ресми дерек бойынша зардап шеккендер жоқ. Мамандар жол бойынан 18 көліктің 16-сын шығарған. Екі көлік эвакуатормен тасымалданды. Қазір оқиғаның мән-жайы анықталып жатыр.

Түнде құтқарушылар 24 жолаушыны эвакуациялады. «Алматы-Өскемен» тасжолында Талдықорған қаласынан 10 шақырым жерде жолаушылар автобусы тұрып қалды. Төтенше жағдайлар министрлігінің құтқарушылары көмекке барды.

Одан бөлек, Алакөл ауданы «Үшарал-Достық» тасжолында жеңіл көлік қар құрсауында қалып қойды. Жетісу облысының құтқарушылары көлік тізгіндеген ер адамды «Достық» станциясына жеткізген. Мамандар сапарға шығарда көліктің техникалық жағдайын және ауа райын мұқият қадағалауды ескертеді.

Ал Атырау облысында 112 желісіне «Атырау-Доссор» автожолының 30 шақырымында жеңіл көліктің жанармайы таусылғаны туралы хабарлама түскен. Діттеген жеріне жете алмай қалған көліктің жүргізушісі мен жолаушыларға мамандар тез арада барып, көмектесті. Жолда қалған жолаушыларға медициналық көмек қажет болмаған.