2025 жылға дейін Қазақстанда 100 мың ІТ маманы даярланады

Осы мақсатқа қол жеткізу үшін елімізде білім гранттарының саны арттырылып, 12 жекеменшік IT мектеп ашылған. Содан шыққан түлектер еліміздегі цифрландыру ісіне тартылады. Қазір мемелекеттік қызметтердің 90% электронды түрде жүргізіледі. Ірі қалаларда 5G технологиясы қосылады деп жоспарланған. Экономика, бизнес сектордың да сандық жүйеге көшуі белсенді. Демек ІТ мамандарға деген сұраныстың артатыны анық. Қазіргі әрекет - соған қамдану. 

Қасым-Жомарт Тоқаев, Қазақстан Республикасының Президенті: 
-ІТ саланы дамыту мемлекеттік саясаттың басым бағыты саналады. Бізде Astana Hub құрылған. Қазір онда 900 компания бар. Олар отандық және шетелдік сұраныс бойынша жұмыс жасауда. Мен жуырда АҚШ-қа жасаған сапарым аясында сондағы IT алпауыттарының басшыларымен кездестім. Жақында олар бізде өз өкілдіктерін ашуы мүмкін. Қазақстан цифрлық технология саласында белді ойыншы болуды мақсат етуде.

Айта кетейік «Digital Bridge 2022» – жыл сайын өткізілетін IT саласындағы ең ірі іс-шара. Форумда технологиялар саласындағы қазақстандық және шетелдік сарапшылар, IT-компаниялар мен стартаптар, венчурлық инвесторлар, технологиялық кәсіпкерлер бас қосады. Биыл оның жұмысына 5 мыңға жуық қонақ жиналды.