Азия чемпионаты: Бокстан әйелдер құрамасы 5 алтын жеңіп алды. Спорт жаңалықтары
Бокстан Қазақстан әйелдер құрамасы Азия чемпионатында бес алтынға қол созды. 60 келіде Виктория Графеева шешуші жекпе-жекте Қытайлық боксшыны 5:0 есебімен жеңді. 63 келі салмақтағы Аида Әбікеева Вьетнам өкілінен айласын асырды. Наталья Богданова ринг қожайыны Бейсон Маниконың осал тұсын тауып, 70 келінің мықтысы атанды. Ауыр салмақтардағы Гүлсая Ержан мен Елдана Тәліпова да құрлық біріншілігінде топ жарды. Гүлсая финалда украиналық боксшыдан басым түссе, Елдана өзбек қызын жеңді. Таиландтың Чианг Май қаласында өтіп жатқан Азия біріншілігі ертең ерлер арасындағы финалдық сайыстармен аяқталады.
Футзалдан ұлттық құрама Албаниямен кездеседі
Футзалдан Қазақстан ұлттық құрамасы 2026 жылғы Еуропа чемпионатының іріктеу кезеңіне дайындалып жатыр. Бас бапкер Рикардо Кака алдағы екі кездесуге қатысатын ойыншылар тізімін жариялады. Олардың арасында Лео Игита Біржан Оразов сынды тәжірибелі ойыншылар мен Нұрмұхаммед Исмаилов, Ержан Карменов сынды жастар бар. Қазақстан алдымен 13 желтоқсанда сырт алаңда Албаниямен ойнайды. Сосын 18 желтоқсанда Алматыда Арменияны қабылдайды. Бұл ойындарға жарақатына байланысты Альберт Ақбалықов пен Арнольд Кнауб қатыса алмайды. Іріктеу кезеңі 2025 жылдың 12 наурызына дейін жалғасады. Топ жеңімпазы Еуропа чемпионатына тікелей жолдама алады.
Біржан Оразов, футзалдан Қазақстан құрамасының ойыншысы:
-Дайындық өте жақсы болып жатыр. Біз әлем чемпионатынан кейін көп уақыт өтпеді. Біз осы Еуропа біріншілігіне іріктеуге дайындалып жатырмыз. Дайындық өте жақсы өтуде. Бүгін екінші күн. Бұйырса бүгіннен кейін ұшамыз. Ойындарға дайынбыз деп ойлаймын.
Хоккейші қыздар Словакияға жол тартады
Шайбалы хоккейден Қазақстан әйелдер құрамасы 12-15 желтоқсан аралығында 2026 жылғы Олимпиада ойындарына іріктеу кезеңіне қатысады. Жерлестеріміз үшінші іріктеу кезеңін D тобында өткізеді. Қазір хоккейші қыздар Австрияның Берг қаласында оқу-жаттығу жиынында жүр. Ертең ұлттық құрама Словакияға жол тартады. Қазақстан олимпиаданың жалғыз жолдамасын Словакия, Исландия және Словениямен сарапқа салады.