Cover show сахнасында төртінші маусымның түсірілімі басталды

«Хабар» телеарнасында көрерменнің көзайымына айналған Cover Show бағдарламасының төртінші маусымының түсірілімі басталды. Музыкалық мега-шоу бүгінге дейін талай әнді қайта түлетіп, көпетеген жас әншілерді көрерменге танытып, бағын ашты. Бағдарламаның жаңа маусымында қандай жаңалықтар бар? Биыл кімдер қатысады?

Жобаның басты мақсаты – аға буын мен жаңа толқын арасына көпір орнату, сағындырған әндерге айналған туындыларды жаңа өңдеуде тыңдарманға қайта ұсыну болатын. Бұл мақсат орындалды. Алдыңғы үш маусымда еліміздің музыка қоры жаңарып, эстрадаға жаңаша бағыт әкелген жас әншілердің есімі кең аудиторияға таралды.

Кемелбек Ойшыбаев, «Хабар» Агенттігі» АҚ басқарма төрағасы:

- Төртінші маусымын ашқалы жатырмыз. Үш маусым бойы 200-дей әнші қатысып, 400-ге жуық әндер орындалып, қазіргі таңда ютуб желісінде миллиондаған қаралымдар жинап жатыр. Соның барлығы – үлкен нәтиже, жақсы жетістіктер. Соның арқасында біздер «Хабар» агенттігі осы жобаны жалғастырамыз деп шешім қабылдадық.

Жаңа маусымның ерекшелігі – жоба қатысушылары қатарында танымал әншілер бар. Роза Рымбаева, Жұбаныш Жексенұлы, Толқын Забирова, Құрмаш Мақанов сынды кәсіби музыканттар да көрерменге кавер ұсынады.

Роза Рымбаева, Қазақстанның халық әртісі:

- Көптеген әндер екінші өмірге келіп, жақсы орындаушыны тапты деп ойлаймыз. Себебі орындап жатқан әншілердің бәрі шеберлер. Бүгінгі біздің эстрадамыздағы сахнадағы жұлдыздарымыз, майталман әншілер, белгілі әншілер. Олар мына жастардың әндерін өзінің мәнеріне ыңғайлап, шығарып жатыр. Маған өте қызық болып жатыр сол.

100 минуттан тұратын әр бағдарламада төрт қатысушы бақ сынайды. Олар тыңдарманның құлағына сіңісті болған әндерді жаңа аранжировкада орындайды. Биылғы кавер нұсқалар жанрының әртүрлілігімен ерекше.

Аман Ахмет, әнші:

- Осы жоба жаңа толқындарды ашып жатыр десек болады. Көп танылмай жүрген жігіттер, қыздар бар. Сол кісілерге үлкен бір мүмкіндік беріп жатыр. «Хабар» Агенттігіне үлкен алғыс білдіреміз.

Үздік каверге әдеттегідей жобаның бас сарапшысы Мейрамбек Беспаев пен ауыспалы үш сарапшы өз бағасын береді. Ал жаңа өңдеу, сапалы музыка, талантты орындаушылардың ең басты төрешісі – көрермен. Үздік кавер әнді залда отырған көрермен дауыс беру арқылы анықтайды.

Гүлжан Көленқызы, Сұлтан Бейсекенов