Екі оқушы әлемнің атақты ЖОО түсуге жолдама алды
Солардың арасынан тек 7 бала айырықша дарындылығымен көзге түсті. Қатарында Әлиби Жеңіс және Рүстем Хасанов есімді отандастарымыз бар. Болашағынан зор үміт күттіретін жастар АҚШ-тағы жүзден астам университеттің бірін таңдап, құжат тапсыруға дайындалып жатыр.
SAT Reasoning емтиханында ең жоғары 1580 балл жинап, сәтті тапсырған ақтаулық Әліби Жеңіс қазір Нұр-Сұлтандағы мектеп-лицейде оқиды. Кезекті жеңіспен оралған дарынды өренмен үй-ішінде тілдестік.
Әліби математика пәні бойынша Қазақстан құрамасының мүшесі, республикалық және халықаралық олимпиадалардың жеңімпазы. Келешек мұраты – есептеу техникасы және бағдарламалық қамтамасыз ету маманы болу. Таяуда өзі секілді білімпаз төрт досымен бірге Telegram желіде «QazMath» парақшасын ашты. Математикаға ден қойған кез келген адам олар шешкен күрделі есептермен бірнеше тілде таныса алады.
Әліби Жеңіс,11-сынып оқушысы:
– Ең бірінші есепті салғаннан кейін үш күнде 204 тіркелуші жиналды. Қазіргі таңда оқушылар, мұғалімдер, ғалымдарға дейін сол каналда отырып, бізден үйреніп жатыр. 400-ден астам тіркелушілеріміз бар. Арасында Ресейден, Украинадан, Америка Құрама Штаттарынан да тіркелушілер бар. Университетке түскен соң сондай сайт ашамыз ба деп жүрміз. Ұстазыма, мектебіме, отбасыма барлығына рахмет айтқым келеді.
Динара Жұмашева, Ә.Жеңістің анасы:
– Соңғы 2-3 жылда волонтерлік қызмет жөнінде әңгіме айтып, ақылдасып жүргенбіз. Бірақ үнемі Әліби білім саласына қатысты үлкен Халықаралық шараларды таңдайды. Өткен жылы Астана қаласындағы АҚШ елшілігінің ұйымдастыруымен америкалық университеттердің үлкен көрмесі болған болатын. Сол көрмеде көмектесіп, волонтерлік қызмет атқарды. Келушілерге ақпарат беріп және өзі үшін де пайдалы ақпараттарды жинақтады.
Павлодарлық озат оқушы Рүстем Хасанов та Әлібидің жетістігін қайталап, 1580 балл жинады. Дарынды ер балаларға арналған лицей-интернаттың 11-сынып оқушысы Нью-Йорк университетіне түсуге құжат жинап жүр. Ол бұған дейін информатика пәнінен өткен өңірлік олимпидаларда үш мәрте алтын, республикалық білім сынағында күміс және қола, Infomatrix Asia және евразиялық олимпиадада алтын медаль жеңіп алған.
Рүстем Хасанов, 11-сынып оқушысы:
– SAT Reasoning білім сынағының жүру уақыты 3 сағатқа созылды. Шынымды айтсам, демалуға да мұрша болмады. Өте тартысты әрі мазмұнды өтті десем болады. Маған қойылған сұрақ бұрыннан таныс болғаны қуантты. Бұл емтихан Америка Құрама Штаттарында кеңінен танымал. Содан 1580 балл жинаған адам ол жақтағы 114 университеттің кез кезгеніне құжат тапсырып, оқуға түсе алады.
Ғани Орынбасаров, информатика пәнінің мұғалімі
– Қазіргі пандемия жағдайында, қашықтан оқыту жағдайына қарамай үйде оқып жатыр, анасына көп рахмет. Анасы да бізде ұлағатты ұстаз. Үйде дайындалып, осындай нәтижеге жетіп отыр. Біздің оқушымыздың осындай жетістігіне біз өте қуаныштымыз. Қазір халықаралық Жәутіков олимпиадасына дайындалып жатыр. Жаратылыстану пәндерінен болады. Рүстем сол информатика бағдарламалау пәнінен қатысады.
Айта кетейік, SAT Reasoning емтиханы математикадан бөлек, эссе және мәтінге талдау бөлімдерінен тұрады. Әрқайсында оқушы білімі 200-ден 800 балл аралығында бағаланады. Сынақта үздік нәтиже көрсеткен балаларға АҚШ-тан басқа Азия және Еуропа елдерінің әлемге танымал жоғары оқу орындарының да есігі ашық.
Авторлары: Талғат Исламұлы, Саламат Бекбаев, Самат Оспанов