Климаттық дағдарысты еңсеру үшін АЭС-тің маңызы зор – сарапшы

Климаттық дағдарысты еңсеру үшін қоршаған ортаны мейлінше аз зиян тигізетін қуат көзі ретінде атом энергетикасының маңызы зор. «Ядролық саладағы әйелдер» халықаралық ұйымының вице-президенті осындай пікірде. «Сонымен қатар бейбіт атом саласы - тұрақты даму мақсаттарына жетудің маңызды бөлігі»,- дейді сарапшы. Энергетикалық қауіпсіздікті қамтамасыз етіп, табиғатты сақтап қалады. Әсіресе дамушы елдерге атом энергетикасы қажет. Электр қуаты арзан болса, өнеркәсіп те дамып, түрлі салаларда көптеген жаңа жұмыс орны құрылады. Ал ядролық энергетика кешені жоғары білікті мамандарды дайындайтын орталықтарға айналады.

Мелина Белинко, Women in Nuclear Global халықаралық ұйымының вице-президенті:
-Өзім туып-өскен Аргентинаны үлгі ретінде айтар едім. Өткен ғасырдың 50-жылдары басталған ядролық бағдарлама өндірістің дамуына зор ықпал етті. Атом электр станцияларын жабдықтайтын ұлттық компаниялар пайда болды. Сол кезден бері Аргентина ғылыми-зерттеу және тәжірибе жүргізу бойынша жетістіктерге жетті. Осы салада экспорттық өнімдерді шығаруға қол жеткізді. Осылайша еліміз Австралия, Перу, Алжир және Мысырға зерттеу реакторларын экспорттайтын түрлі халықаралық ядролық жобаларға қатысты.