Бокстан Қазақстан жастар құрамасы әлем чемпионатына аттанды. Спорт жаңалықтары
Бокстан Қазақстан жастар құрамасы әлем чемпионатына аттанды. Мақсат Бақтыбазаров шәкірттері дүниежүзілік біріншілікке дайындықты Алматы облысында пысықтады. Қазақстан құрамасы 13 салмақта сынға түседі. 67 келіде команда капитаны Төрехан Сабырхан жұдырықтасады. Диас Берікбай, Бексұлтан Боранбек, Бауыржан Мұратов және Жансері Көшербаев та тізімде бар. Орта салмақтарда Алексей Хаванцев, Ахмет Үсен, Өнер Сейілхан және Санжарәлі Бегалиев шаршы алаңға шығады. Ауыр және аса ауыр салмақтарда Мадияр Бексұлтанов, Бақытжан Айтмұханов, Расул Асанханов және Аслан Еділбайұлы өнер көрсетеді. Әлем чемпионаты Черногорияның Будва қаласында 23 қазан мен 3 қараша аралағында өтеді.
Мақсат Бақтыбазаров, бокстан жастар құрамасының аға бапкері:
-Дайындық жалпы жақсы. Құдай қаласа бабымыз бен бағымыз қатар шауып, жігіттер жеңіл барып, ауыр қайтады деп отырмыз. Оның үстіне алтын көп болады деп ойлаймыз. Енді жастардың аяқ алысы өте жақсы.
Төрехан Сабырхан, бокстан жастар құрамасының капитаны:
-Мақсат ағай, Ілияс ағай ақылдарымен лапада, грушада жақсы жұмыс істеп, салмағымызды да орнына келтіріп, формаға да кіріп жатырмыз. Осы әлем чемпионатында командалық бірінші орын алып қайтуымызға мен сенімдімін. Өйткені балалар бәріміз жарысып, бәрінің көңіл күйі өте керемет.
Жәнібек Әлімханұлы мен Хамза Шираз ақпан айында кездеседі.
Қос мықты Эр-Рияд қаласында Джошуа мен Дюбуа арасындағы қарымта бокс кеші аясында жолығуы мүмкін. Бұл жөнінде промоутерлік компанияның басшысы Боб Арум мәлімдеді. Бүкіләлемдік бокс ұйымы қазақ жігітін британиялық былғары қолғап шеберімен жұдырықтасуға міндеттеген болатын. Жәнібек WBO тұжырымы бойынша чемпиондық атағын қорғауы қажет. Енді екі боксшының менеджерлеріне келісім жасасу үшін 15 тәулік уақыт берілді. Ұлыбританиялық Хамза Шираз WBO және WBC тұжырымдары бойынша әлемдік рейтингте бірінші тұр. Ол кәсіби рингте 25 кездесу өткізіп, бірде-бір рет жеңілмеген. 21 жекпе-жекті уақытынан бұрын аяқтаған. Жәнібек те жеңіліп көрген жоқ. 16 кездесудің барлығында басым түсті. Жерлесіміз WBO мен IBF тұжырымдары бойынша әлем чемпионы саналады. Ол бірер апта бұрын Сидней қаласында жаңазеландиялық Андрей Михайловичті нокаутпен ұтып, чемпиондық атағын қорғап қалды.