Театрда кассир болып бастап, кино әлемін мойындатты. Канн кинофестивалінде «Үздік актриса» атанған Самал Есләмованың жеңісіне жерлестері қуанып жатыр. Ол – Солтүстік Қазақстан облысы, Аралағаш ауылының тумасы.
Ілияс Есләмовтың телефонына дамыл жоқ. Кешеден бері құттықтау қоңыраулар мен қонақтар. Қыздары Самалдың жеңісіне әсіресе ата-анасы балаша қуанып жатыр.
Ілияс Есләмов, Самалдың әкесі:
- Шешесі кішкентай болғанда еркелетіп, өлең айтатын. «Біздің Самалегымыз ұшаққа мініп алып, Мәскеуге ұшып кетті», – деп келтіріп шешесі айтатын. Қазір сол өлеңі дәл келді.
Анасының айтуынша, Самал кішкентай кезінен-ақ ауыр жұмыстарға араласып, әкесінің жанында жүретін. Кенже қыздары құдықтан су тасып, отын жарып бойжеткен.
Гүлмайра Есләмова, Самалдың анасы:
- Ол ылғы айтатын: «Бір қызым бар, екіншісі тағы да қыз. Енді ұл болса, қандай болар еді? Қыздың арқасы», – деп. Көлік жүргізеді, атқа да мінеді.
Самал Есләмова – Петропавлдағы Сәбит Мұқанов атындағы қазақ сазды-драма театрының түлегі. Өнер колледжінің студенті бастапқыда кассир болып, кейіннен спектакльдерде ойнай бастайды.
Біржан Жалғасбаев, С.Мұқанов атындағы қазақ сазды-драма театрының директоры:
- Турашыл, шыншыл болатын. Жас болса да шындықты айтады. Одан кейін тез қабылдап алатын, 1-курсқа түскен кезі ғой. Көзі бір ерекше. Сондай тұнық, тап-таза. Кешеден әлеуметтік желілерден естіп, көріп жатырмыз ғой. Бұл – үлкен дәреже.
Самал Есләмова «Айка» картинасында сомдаған басты рөлі үшін Канн кинофестивалінде «Үздік актриса» атанды. Ол – бұл байқауда жеңіске жеткен тұңғыш қазақ қызы.
Авторлары: Айдарбек Айтмұхамбетұлы, Төлеген Иманов
