Мектептерде қауіпсіздік сабақтары өткізіледі. Яғни түрлі жағдайдарда оқушылар абдырап қалмай, дұрыс әрекет ете алуы қажет. Үкімет басшысы Әлихан Смайылов салалық ведомство жетекшілеріне тиісті тапсырма берді. Бұл кеше Петропавл қаласындағы нөмірі 4 мектепте болған жағдайдан кейін қолға алынып отырған шара. Еске салайық, 13 ақпанда 9 сынып оқушысы мектепке балта мен пышақ алып кіріп, үш жасөспірімді жарақаттаған еді. Күдікті баланың психикалық ауытқуы болған. Қаскөйді жоғары сынып оқушылары мен мұғалімдер тоқтатты.
Әлихан Смайылов, ҚР Премьер-Министрі-Бейнекамералардың санын көбейтіп, мектепке кіреберіс жерлерге бақылауды күшейту мәселесін қарау керек. ІІМ келісілген ұсыныстарды енгізсін. Денсаулық сақтау министрлігі зардап шеккен балаларды емдеуді ерекше бақылауға алсын. Оқу-ағарту министрлігі ІІМ және ТЖМ бірлесіп қауіпсіздік сабақтарын әзірлеуі қажет. Балалар әртүрлі жағдайда өздерін қалай ұстауы керектігін нақты білуі тиіс.
Негізінде аталған оқу ошағында 42 бейнебақылау камерасы мен 5 дабыл батырмасы бар екен. Оқу-ағарту министрлігінің дерегі бойынша жалпы Қазақстанда 7 мың 687 мектеп болса, солардың барлығы бейнебақылау камерасымен қамтылған. Қазіргі уақытта оларды ішкі істер органдарының жедел басқару орталықтарына қосу және ескі камераларды техникалық жаңарту көзделіп отыр. Білім ошақтарының 77% кіруді бақылау және басқару жүйелері, яғни турникеттер бар. Мектептердің 85% лицензияланған күзетпен келісімшарт жасасқан. Ал дабыл батырмаларына келсек, ірі қалаларда орналасқан мектептердің 98% осындай ескерту қондырғысымен қамтылған.
