Қазақстанда заңмен шектелген 20-ға жуық діни ағым бар. Бұл мәселе Бурабайда өткен Құрылтайда Президент тарапынан көтеріліп, жауаптыларға арнайы тапсырмалар берілді. Сонымен қатар ағымдардың ықпалына түскен азаматтарды дұрыс жолға салу мақсатында 5 мың имам мен теолог жұмыс істеп жатыр. Ішкі істер министрлігі заңсыз діни кітаптарды сақтап, таратқан азаматтарға қатысты шараларды күшейтіпті.
Амангелді Байболсын 30-дан асқан шағында жат ағымның жетегінде жүріп, біраз адасқанын айтады. Содан шаңырағы шайқалып, жолдасымен ажырасып кеткен. Заңсыз топқа еруге әрекеттенгенде, құзырлы органдар оны дер кезінде байқап, шара қолданған.
Амангелді Байболсын, қала тұрғыны:-Басында менде өшпенділік болды. Неге бұлай? Неге Қазақстан бұлай емес деген сияқты. Құзырлы органдар, комитет деп айтамыз ғой, теологтармен таныстырды. Қатені нақты дәлелдермен түсіндіріп берді. Мен ойланып бастадым. Менің оқып жүргенім сүннет бойынша емес екен.
Атыраудағы «Шапағат» оңалту орталығында имамдар 3200 адасқан адамға діни теологиялық және психологиялық көмек көрсеткен. Оның ішінде 500-ден астамы дәстүрлі дінге, мыңнан астамы ұлттық құндылықтарға бейімделіпті.
Сұлтанкелді Серікұлы, «Шапағат» деструктивті діни ағымдардан жапа шеккендерге көмек орталығы» қоғамдық қорының бөлім басшысы:-Жастардың санасының улануының негізгі себебі – өзінің тарихын, дәстүрін, әдет-ғұрыпын жақсы білмеуі және діни мағлұматының аз болуы. Мынадай нәрсе, араб мәдениеті және ислам мәдениеті бар. Екеуі әртүрлі дүние. Жат ағымға кетіп жатқандардың көбі ислам мәдениетіне емес, араб мәдениетін зерттеп, арабтарға еліктеп кетіп жатқанын да көреміз.
Бурабайда өткен IV Құрылтайда Мемлекет басшысы діни ұйымдардың қызметін реттейтін құжаттардың талаптарға сай болуы керектігін атап, жауаптыларға тапсырма берді.
Қасым-Жомарт Тоқаев, Қазақстан Республикасының Президенті:-Мәжіліс депутаты Ермұрат Бапи еліміздегі діни ахуалға алаңдаушылық білдіріп жүр. Құрылтай мүшелері Дания Қыдырбаева және Олжас Сүлеймен жат діни ағымдардың жастар арасында әсіресе спорт саласында ықпалы күшейіп бара жатқанын айтты. Теріс ағымдарға, қазақтың болмысына жат идеологияларға тосқауыл қою қажет екеніне еш күмән жоқ. Елімізде дін бостандығына кепілдік берілген. Бірақ жүгенсіздікке, тәртіпсіздікке жол беруге болмайды. Діннің аса маңызды миссиясы – ұлтты ұйыстыру. Діни басқарма маманының айтуынша, елде заңмен шектеу қойылған 20-ға жуық жат ағым бар. Олардың басым бөлігі сырттан келген. Ортақ сипаттары ислам діні болғанымен, кейбіреулерін ажырату қиын көрінеді. Данияр Кенжалин, ҚМДБ Діни оңалту бөлімі меңгерушісінің міндетін атқарушы:-Кез келген діни ұйым бізге келген кезде барынша таратуға тырысады. Таралуды жасырын түрде жасауы мүмкін. Саған имам келген кезде, теолог келген кезде, басқа да қызметкер келген кезде қалай сөйлесу керек. Қалай өзіңді білдіртпеу керек. Бастысы оған діни тұрғыда рұқсат береді. Өтірік айтуға, жасыруға, үндемей қалуға. Ол қауіпті дүние.
Былтыр 120 адам экстремистік сипаттағы діни кітаптарды сақтағаны үшін әкімшілік жауапкершілікке тартылып, оларға 21 миллион теңге айыппұл салынды. Ал 217 азамат діни әдебиеттерді заңсыз сатқаны үшін жауапкершілікке тартылып, 30 миллион теңге айыппұл төледі. Сонымен қатар 13 мыңнан астам экстремистік мазмұндағы сайттар анықталып, бұғатталды.
Мейіржан Мұратханұлы, ҚР ІІМ Экстремизмге қарсы іс-қимыл департаментінің басқарма бастығы: -Жыл басынан осындай 20 қылмыс анықталды. Оның 19-ы қылмыстық жауапкершілікке тартылуда. Қылмыстық кодексте 256-бабы бойынша ол - терроризмді насихаттау. Ауыр қылмыс санатына жатады. Үш жылдан жеті жылға дейін бас бостандығынан айыру жазасы көзделген.
Мамандар жат ағымның жетегіне кеткен адамды өздігінше жөнге салып немесе жағдайды ушықтыруға болмайтынын ескертеді. Айтуларынша, мұндай жағдайда бірден Діни басқармаға немесе 102 нөміріне хабарласу керек.
Диана Қадыр, Қали Несіпбаев
