Талдықорғанда газ балоны жарылып, 8 адам жарақаттанды

Олардың үшеуі – бала. Зардап шеккендер қаладағы ауруханаларға жеткізілді. Төртеуінің жағдайы аса ауыр деп бағаланып отыр.

Оқиға орнына сегіз жедел жәрдем көлігі мен полицейлер, газ қызметі және өрт сөндірушілер келіп жұмыс істеді. Сала мамандары: «5 литрлік баллонды пештің жанында қолдану жарылысқа себеп болған», – деп болжам жасап отыр.

Қанат Алтынбеков, қалалық ТЖБ бастығы:

– Оқиға орнында жедел штаб құрылды. Сонымен қатар жарылыс салдарын анықтау үшін арнайы зертханалық лаборатория жұмыс істеп жатыр. Зардап шеккендердің туысына басқарманың психологтары көмек көрсетті.