Жауапкершілік жүгі жеңіл болмайды - Берік Уәли
Ірі инфрақұрылым жобалары, цифрландыру және жасанды интеллект, ядролық энергетиканы дамыту, агроөнеркәсіп кешенін нығайту және инвестиция тарту. Мемлекет басшысы Үкіметтің кеңейтілген отырысында атқарушы биліктің міндеті мен негізгі бағдарын осы салалардың төңірегінде тізіп, белгілеп берді. Халықтың сұранысы негізінде қойылған үлкен міндеттің жауапкершілігі де жоғары. Бұл туралы «Айқын» газетіне берген сұхбатында Президенттің кеңесшісі - баспасөз хатшысы Берік Уәли мәлімдеп, Қасым-Жомарт Тоқаевтың тапсырмасының маңызына тоқталды.
Президент Қасым-Жомарт Кемелұлы саясаттағы ұтқырлықты әлеуметтік-экономикалық дамудағы нақты қадамдармен үйлестіруді жөн санайды. Яғни реформалар қағаз бен сөз жүзінде қалмай, елдің әл-ауқатынан көрініс табуға тиіс. Ол үшін:
Берік Уәли, ҚР Президентінің кеңесшісі - баспасөз хатшысы:
-Ел экономикасын әртараптандыру – өте маңызды бағыт. Соның ішінде осыған дейін оң өсім тіркеліп келе жатқан өңдеу өнеркәсібіне барынша жағдай жасалып жатқанына тоқталды. Ерекше назар аударатын дүние, ірі өнеркәсіп жобаларының іске асырылуы баяу жүріп жатқанын сынға алды. Оны елден шығарылған заңсыз активтерді қазынаға қайтару ісімен қатар жүргізу қажеттігін айтты. Үкіметке орта буындағы кәсіпорындар шоғырын қалыптастыру туралы тапсырма берді. Агроөнеркәсіп кешенінің әлеуетін арттыру бағытындағы маңызды бастамалар бар. Екінші деңгейлі банктердің экономиканы қаржыландыруы тұрғысынан нақты міндеттер жүктеді. Игерілуі күрделі кен орындарын экономикалық айналымға қосу туралы ойымен бөлісті.
Аталған міндеттерді айту бөлек, оны іске асыру нақты қадамдармен айшықталады. Инвестиция керек. Президент кеңесшісі атап өткендей былтыр Қасым-Жомарт Тоқаев 20-дан астам елге сапармен барды. Мемлекет басшыларымен, бизнес өкілдерімен кездесіп, қаражат тартуға бастамашы болды. Себебі инвестицияға сұранып тұрған жаңа бағыттар бар.
Берік Уәли, ҚР Президентінің кеңесшісі - баспасөз хатшысы:
-Қазір әлемде сирек кездесетін металдарды өндіру мен өңдеуге артып келе жатқан сұранысты тиімді пайдалану керек. Осы мақсатта еліміздің әлеуетін дұрыс іске асырған жөн. Мәселен, Үкімет басшысы елімізде аталған бағытта 17 кен орны ашылғанын айтты. Оның ішінде литийдің орны ерекше. Міне, осы салаға инвестиция тартылса, озық технологиялар келсе, шетелдік және отандық инвесторларға бірдей жағдай жасалса, еліміздегі инвестициялық климатты айтарлықтай жақсарта түсетіні анық. Қазір бұл тарапта геологиялық барлау жұмыстарын жүргізу үшін инвесторларға үлкен мүмкіндік беріліп отыр. Яғни олар өз шығындары есебінен әрі барлау жүргізеді, әрі жер қойнауын пайдалану құқығына ие болады. Осы ретте елімізде Жер қойнауын пайдалану бойынша реформа жүргізіліп, оның заңнамалық платформасы әзірленіп жатыр.
Берік Уәли атап өткендей, Президент инфрақұрылымдық даму, энергетика жүйесі және көлік транзиттік бағыттарға да баса мән беріп отыр.
Қасым-Жомарт Тоқаев, Қазақстан Республикасының Президенті:
-Мойынты – Қызылжар» бағытында жаңа теміржол құрылысын бастауды тапсырамын. Сондай-ақ Қызылжар бекетінен Ақтау портына дейінгі күре жолдың қозғалысы аса көп учаскелерін жаңғырту керек. «Алтынкөл – Жетіген» теміржолын да кеңейту қажет. Бұл Қытай мен Орталық Азия арасындағы көлік дәлізінің әлеуетін едәуір арттырады.
Бұдан бөлек Президент атом электр стансасының құрылысына айрықша тоқталды. Әңгіме станса салып алып, болдым, толдым деу емес, ядролық класстер құруда. Атом саласының ұзақ мерзімді жоспарын құруды тапсырды. Бұл энергетикалық тәуелсіздіктің стратегиялық қамы. Сондай-ақ цифрландыру, жасанды интеллектіні енгізу міндеттері заман талабы. Сонымен қатар әлеуметтік міндеттер де назардан тыс қалмайды. Өткен жылы ауыл аймақтарда алғашқы дәрігерлік көмек көрсететін 460 жаңа нысан салынса биыл тағы 200-і қолданысқа беріледі. Одан бөлек 32 аурухана жөнделеді. Жемқорлардың желкесінене шығарылған ақшаларға Жайлы мектеп жобасы іске асып, биыл ол аяқталмақ. Президент елге лақап ат берушілерге неге шүйлікті? Бұл мәселенің төркінін Берік Уәли былай деп түсіндірді.
Берік Уәли, ҚР Президентінің кеңесшісі - баспасөз хатшысы:
-Еліміздің жақсы атын ел азаматтары шығарады. «Заң мен тәртіп» қағидаты да осыған негізделген. Біз өзіміздің құқығымызды қалай қорғасақ, мемлекетіміздің де беделін солай сыйлауға әрі қорғауға тиіспіз. Сонда ғана еліміздің еңсесі көтеріледі. Сол үшін бір-бірімізді бекер жәбірлемей, ортақ игі іске жұмылып, мемлекетшілдік сананы орнықтыра бергеніміз жөн. Қадыр Мырза Әлінің «Тәуелсіздікті сәт сайын қорғау керек» деген қанатты сөзі бар. Мемлекеттің ар-намысы әр азаматының ұяты мен ожданына айналуы керек.
Жалпы жұмыс көп. Үлкен міндет үлкен жауапкершілікті қажет етеді. Сол үшін де Мемлекет басшысы стратегиялық бағыттарды белгілеп, желдің қай жақтан соғатынын, оған қарсы амалдарды санамалап айтып берді. Ендігісі бел шешіп кірісу. Іске сәт.
Авторы: Берік Дүйсенбай