Жамбыл өңірінде туризмді дамытуға ден қойылып отыр. Облыс орталығында бірнеше тарихи кезеңді біріктіретін ауқымды туристік алаң ашылады.
Жүз жылдан аса тарихи құндылығы бар көне үй
лер өткен күннен сыр шертеді. «Әулиеата кезеңі» деп аталын бұл ғимараттар 90-шы жылдары жеке меншік иелігіне өткен. Кейбірінің қабырғасы қаңырап, қауіпті аймаққа айналған. Қазір Туризм басқармасы үй иелерімен келіссөздер өткізіп, тарихи құжаттар негізінде бұрынғы сақталған қалпына келтіру үшін жұмыстар жүргізуде.
Жомарт Жүнісов, кәсіпкер:
- Біздің келбетіміз баяғы заманға сай келіп тұр. Онда жөндеу жұмыстарын жасап тұрамыз, бір келбетке бояймыз десе, біз оған қарсы емеспіз. Енді кәсіпкер болған соң бәріне икемделеміз ғой, заманына сай жұмыс істейміз.
1962 жылы негізі қаланған ғалым Константин Скрябин тұрған музей үй, тоқсаныншы жылдары сейсмологиялық қауіп-қатерге байланысты жабылған болатын. Биыл міне қайтадан жаңғыртылған бұл нысан ел игілігіне пайдалануға берілді.
Жалпы өңірдің ішкі туризмді дамыту картасына енгізілген кешен 26 ғимаратты құрайды, ал олардың 15-іне күрделі қайта жөндеу жұмыстары қажет. Егер жоба биылдан бастап қолдау тапса, аймақ экономикасының ілгерілеуіне үміт зор.
Қарлығаш Аралбекова, Жамбыл облыстық туризм басқармасының басшысы:
- Жарықтандыруы, гүлдер деген сияқты оның барлығы сол кездің тарихына үйлесімді келіп тұру керек. Сонда туристер өткен ғасырға сапар шеккендей болып, ол жерден жақсы әсерде кету керек.
Қырмызы Жексенбек, тілші:
- Шаһардың көркіне айналғалы тұрған тағы бір туристік кешен «Әулиеата кезеңі» деп аталып, ол мына тұрғын үйлерді қамтитын болады. XIX ғасырдың аяғы мен XX ғасырдың бас кезінде бұл жерде бай көпестердің, қолөнершілердің тұрғын жайлары, сондай-ақ сауда дүкендері болған.
Сауран Қалиев, тарихшы, археолог:
- Біздің тұрған бөлігіміз Тараз қаласы, Бектұрғанов көшесі, одан кейінгі Пушкин көшесі, Асқаров көшелері, одан кейін Төлеби көшелерінің төменгі бөліктері толығымен «Әулиеата кезеңіне» жататын қала құрылысының ерекше сәулет өнерінің туындылары болып табылатын ескерткіштер есептелініп отыр.
Болашақта «Әулиеата кварталы» мен «Ежелгі Тараз» тарихи-мәдени орталығын бірыңғай туристік жаяу жолмен біріктіру жоспарлануда. Сан ғасырлар бұрын Ұлы Жібек жолының бойында тіршіліктің күре тамыры болған ежелгі Тараздың тарихи бай мұрасы осылайша өңірдің әлеуетін арттыра түспек.
Авторлары: Қырмызы Жексенбек, Бахытжан Бапаев, Руслан Ахатіллә
