Батыс Қазақстан облысындағы Қайыңды-Жалпақтал-Жұлдыз-Қарасу жолы күрделі жөндеуді талап етеді. 14 елді мекенді орталықпен жалғайтын жолдың қазіргі күйі көңіл көншітпейді. Көктем, күзде тұрғындар ми батпаққа батып, апталап жолда қалады. Жыл сайын жүздеген миллиард теңге қаржы қаралғанымен, мәселе шешілер емес.
Жалпақтал ауылынан Жұлдыз, Қарасу бағытына қарай шыққандағы мына сайды ел аузында Қабансай деп атайды. Одан әрі асқанда жол үзіледі. Ескі көпірді су шайып кеткеніне біраз жыл болған. Қазір көліктер 3-4 шақырым айналып, Сакрыл көлінің суын реттейтін шлюздің үстімен өтіп жатыр. Міне жолдың осы тұстары көктем-күзде мүлде жүргізбейді. Тұрғындар ми батпаққа батып, жол азабын тартып келеді. Сұңғат Ерсейітов, Көмекші ауылының тұрғыны: -Қатты балшық болған кезде апталап жоқ болады ғой, қор боласың. Бір-бірін сүйрейді, жақын жерден, Көмекші ауылынан трактор шақырады. Біздерден трактор шақырып алады. Сүйреп шығарып жібереді. Аққу Русланқызы, Сатыбалды ауылының тұрғыны: - Бала кезден осы жолмен жүріп келеміз. Жаңбыр жауған сайын, күн құбылған сайын жол қатынау қиын соғады. Сондықтан жолдың дұрысталуын, түзелуін сұраймыз.
Осы Қабансайдың арғы бетінде 14 елді мекен бар екен. Жөндеу жүргізілсе, Чапаев-Казталов жолын Чапаев-Жаңақала-Сайқын жолымен қосуға да мүмкіндік пайда болмақ. «Бұл өз кезегінде ауыл тұрғындарының тұрмысын түзеп, шекаралас аудандағы халық саны азаймауына септігін тигізер еді», – дейді ауыл азаматтары.
Мәди Меңдешев, Казталов аудандық мәслихатының депутаты: - Сол 15 шақырымды істеп, көпірді салып, Көктеректің бұрылысына өткізіп берсе, қалғанына халық даламен қашып, жолмен қашып жүреді. Мына жер көлік өткізбейді. Турасын айтқанда, көлік өте алмайды. Газ-66 да батады, трактор батады. Қыста қар болса жүре алмайды, көктемде батпақтан жүре алмайды.
Қайыңды-Жалпақтал-Жұлдыз-Қарасу жолының жалпы ұзындығы 98 шақырым. Осы жолдың Жалпақтал ауылына дейін және кейінгі 40 шақырым бөлігіне кезінде жоба да жасалған екен. Алайда жүзеге аспай отыр.
Мұрат Залмұқанов, облыстық жолаушылар көлігі және автомобиль жолдары басқармасы басшысының орынбасары:- 2022 жылы жоба дайындалды. Бірақ республикадан ақша болмағасын, жоба жасалып, сараптамаға кірмей, қазір тоқтап тұр. Сол саналған уақытта 17 млрд ақша керек болды.
Биыл өңірде облыстық және аудандық маңыздағы 212 шақырым жолды жөндеуге 44 миллиард теңге бөлінген. Алайда бұл қаржы аздық етеді», – дейді мамандар. Себебі ұзындығы 4834 шақырым жергілікті жолдардың тек 56% асфальт төселген.
Е. Жылқайдарұлы, Қ. Ақырап, Э. Аюпов
