23:30Әрі қарай: «Қазақ хандығы» телехикаясы
+7 (7172) 757 540
astananews@khabar.kz

Қарағанды зауыты болатты дезоксидтейтін қорытпа өндірмек

  • Категория: Қоғам
Қарағанды зауыты болатты дезоксидтейтін қорытпа өндірмек

Қарағанды облысы бірінші болып ферросиликоалюминий өндірісін бастайды.

Бұл – қазақстандық ғалымдар әзірлеген технология бойынша отандық шикізаттан шығарылатын өнім.

Болатты дезоксидтеуге қолданылатын «Қазақстандық» қорытпасын «Сарыарқа» арнайы экономикалық аймағында салынып жатқан Қарағанды кешенді қорытпалар зауыты өндіреді. Сарапшылардың айтуынша, бұл өнімге сұраныс жылына 4 млн тонна шамасында.

Іргесі енді қаланып жатқан мына алып зауыт 90 гектарлық аумаққа салынады. Қазір жеті цехтің ең алғашқысының құрылыс жұмыстары жүргізіліп жатыр. Алдағы уақытта осында «Қазақстандық» қорытпасы шығарылады. Ол болаттың дәстүрлі дезоксиданттарының анағұрлым тиімді аналогы болып есептеледі.

Дмитрий Кравченко, Кешенді қорытпалар зауыты бас директорының өндіріс жөніндегі орынбасары:

- Болатты дезоксидтеу технологиясы ферросилиций мен алюминийдің бірлесе қолданылуын қамтиды. Ал кешенді қорытпаны аталған екі компоненттің орнына енгізген кезде, алюминийдің болатқа сіңуі жоғары деңгейде жалғасып, мықты болат түзіледі. Есесіне аллюминий мен кремний шығындары бірнеше есе азаяды. Бұл болат өндірісінің өзіндік құнын төмендетуге мүмкіндік береді.

Қазақстандық қорытпа әлемдегі алты металлургиялық зауытта сынақтан сәтті өтті. Қытаймен жылына 100 мың тонна шикізат жіберуге келісімшарт жасалған. Жоба инвесторы – Bonarda Invesments халықаралық тобы.

Сәкен Есжанов, Кешенді қорытпалар зауыты бас директорының орынбасары:

- Бұл топ әлемнің сегіз мемлекетінде жұмыс істейді және әлемдегі жоғары көміртекті ферромарганецті өндіретін ең ірі кәсіпорындарының бірі. Топ қазақстандық ғалымдар әзірлеген технологияға қызығушылық танытып, зауыт құрылысына инвестиция салуға шешім қабылдап отыр. Бүгінгі таңда біздің инвесторлар үшін не маңызды деген сауалға келсек, инвесторлар мен мемлекеттік органдар арасында қол қойылған шарттардың тұрақтылығы ғана керек.

Инвестор өз қаражаты есебінен АЭА электр қуатын 180 МВт-тан 475 МВт-қа дейін кеңейтеді. Алғашқы өнімдерді шығару 2022 жылдың соңына жоспарланған. Бастапқы кезеңде осында жылына 180 мың тонна қорытпа өндірілмек.

Авторлары: Дәуренбек Бағдәулетұлы, Сайлау Игіліков, Аслан Демесбаев

Сондай-ақ...