Азия чемпионаты: ерлерден 9 боксшымыз финалға шықты

Ерлер арасындағы бокс бәсекесінде ұлттық құраманың тоғыз спортшысы алтынға таласады. Жартылай финалда шаршы алаңға шыққан 10 жігітіміздің тек біреуі ғана жеңілді.

80 келідегі Ерасыл Жақпеков өзбекстандық Тұрабек Хабибуллаевқа есе жіберді. Енді өзге боксшылардың жолына көз тігеміз. Санжар Тәшкенбай, Махмұд Сабырхан, Оразбек Асылқұлов, Дулат Бекбауов, Абылайхан Жүсіпов, Диас Молжігітов Азия чемпионатының финалына жолдама алды.

Ауыр салмақтардағы Бекзат Нұрдәулетов пен Сағындық Тоғамбай және Айбек Оралбай да алтын үшін айқасқа түседі. Ерлер арасындағы құрлық біріншілігінің финалы 11-ші желтоқсанда өтеді.

Айбек Оралбай, бокстан ұлттық құрама мүшесі: 

- Қайрат ағайдың баптауында жігіттер сақадай сай болып тұр. Аллаға шүкір, финал ақтық бір жекпе-жек қалды. Бұйырса, сол жекпе-жекте жігіттер мен өзім қазақ елін қуантамын деп сөз беремін.