29 маусым «Бес жұлдыз» мегажобасының гранд-финалы өтеді

29 маусым күні кешкі сағат 19:00-де «Бес жұлдыз» мегажобасының гранд-финалы өтеді. Осыған дейін көрсетілген 16 бағдарламаның жеңімпаздары «Хабар» телеарнасының тікелей эфирінде бақ сынайды. Шығармашылық топ ақтық сайыстың мінсіз өтуі үшін күн-түн демей жұмыс істеп жатыр.

«Бес жұлдыз» жобасының жеңімпазы атансам дейтін жас әншілер де сенбінің кешін асыға күтуде.

Аршын Кемелжан, тілші:
- Дәл қазір «Бес жұлдыз» сахнасында финалдық кезеңнің дайындық жұмыстары жүріп жатыр. Бірінші кезеңнен сүрінбей өткен 16 қатысушы жеребе тартып, өздерінің реттік номерлерін анықтауда. Сол реттік номерлері бойынша ертең финалдық кезеңде сахнаға шығады.

Гранд-финалға қатысушылар бұрыңғыдай ел ішінде кең тараған әндерді орындамайды. Олар ақтық сайыста жаңа ән айтуы тиіс. Бірі лирикалық, екіншісі патриоттық әндер жаздырыпты.

Финалға жолдама алған жас таланттың бірі Римма Ахметова. Римма: «Үміткерлердің барлығы шетінен мықты»,- дейді.   

Римма Ахметова, «Бес жұлдыз» жобасына қатысушы:
- Менің әнімнің тақырыбы – «Көктем». Көктем жай ғана мезгіл емес, ол – махаббат, табиғаттың оянуы және одан да басқа керемет құбылыстар. Осы әнді жазу маған оңай болған жоқ. Сөзін жазуға екі айдай уақыт кетті. Аккордтарын, музыкасын, сөздерін өзім жаздым.

Жобаның мақсаты – танылмай жүрген жас таланттардың бағын ашу, жұлдызын жағу. «Бес жұлдыз» мега-шоуының жеңімпазы қаржылай сыйлық пен Бали аралына саяхат сертификатымен мараптатталады. Үміткерлер көрерменнің көңілінен шығып, топжару үшін тыңғылықты дайындалып жатыр.

Айта кетейік, көрерменнің көңілінен шыққан «Бес жұлдыз» жобасының гранд-финалы ертең кешкі сағат 19:00-де көрсетіледі. Тікелей эфирде өтетін бәсекелі шоуға көрермен «Хабар» арнасының телеграм каналы арқылы дауыс береді. Шын талантты көрермен анықтайды.

Аршын Кемелжан, Валентин Лобанов